沙巴酒店開箱︱酒店開箱文一向唔係我強項，粗略睇返記錄3百幾篇文裡好似只寫過一兩篇
顯然易見啦，我去旅行有幾何住酒店呢，不嬲d住宿都係一開門得張床一眼見哂，寫遇到咩怪人既機會仲多!
但今次有任務在身，住既地方當然不能太hea~
呢間全沙巴最貴既酒店「Shangri-La Tanjung Aru, Kota Kinabalu 亞庇丹絨亞路香格里拉水療渡假村」，估佢唔到性價比極高之餘，仲有非常完善既設施同完美既服務~ 好hea到只為左住佢而飛嚟沙巴都覺得抵呀!
誇張左? 無d咁既事~ 你睇埋落去先講啦~
1. 酒店地點
「Shangri-La Tanjung Aru, Kota Kinabalu 亞庇丹絨亞路香格里拉水療渡假村」位於沙巴市中心與機場中間，兩者去既距離都係的士10分鐘內，約RM8~10 即 $14-$18港幣啦
此酒店最大賣點就係座落於全球知名的海灘丹絨亞路Tanjung Aru旁邊，風景非常優美~
缺點係周邊無野食無Seven，不過當地的Grab food外賣速遞成熟叫咩都得，加上call Grab taxi咁平，出去食都無問題~
(前幾篇講過既超有名炸雞店，呢張相門口呢埋就係等緊送貨員既Grab food)
2. 酒店格局
酒店定位係高級渡假村，所以存在大量「唔知係度做乜但又幾relax下wor」既元素
例如門口有個音樂家好專心咁敲d無人聽既音樂，內庭有個負責養蚊既荷花池假瀑布啦
加上bell boy主動開車門囉行李，welcome drink，free birthday cake，以及各一流服務態度既工作人員等等，未入房已有滿滿的好感~
例如門口呢個牌真係唔知用嚟做乜，但有佢係度又好似有feel d～
養蚊既荷花池
3. 房間內部
我今次係住既房型係Kinabalu Wing Seaview Room~
未算係最高級，但一開房門果下都大大聲Wa~~~~~~~左!
係無敵大露台+無敵大海景呀!!!!!!
根據小弟既鐵板神算，三得個三六得個六，指南針話呢度係向西ge!!!!
即係話可以攤係露台唔著衫unun腳飲住酒睇日落呀!!!!! Unbelievable~ (詹端文tone)
傻啦隔離左右會睇到ga，而且下文會講到酒店內其他更好既睇日落地方的~
至於其他床軟得嚟唔會軟到腰痛，花曬熱水夠力又穩定，有冰桶+製冰機比你雪酒雪飲品或玩其他野，知道有人生日仲會係當日執房先靜雞雞整decoration ，一切都非常滿意貼心~
係咁熱既地方有免費製冰機真係大加分～
4. 玩樂設施
去渡假酒店我最重視就係個泳池! 我直情覺得泳池質素係反應酒店質素tim!
泰國式既sky infinity pool就無啦，十足汶萊六星級帝國酒店level既海邊infinity pool一樣無敵~
就算唔落水，係池邊曬下太陽𥄫下女都係人生一樂也~
而主池內亦有貼心設計，有大量水中座位比人浸住水涼住chill~
同時唔知邊個白痴設計，渡假泳池竟有1.9M水深，李光珠都浸襯呀!
於是就出現大量人著救生衣浮浮沈沈……(counter有得免費借)…… 係一個悠閒既渡假泳池出現鐵達尼既感覺都算奇景了……
由於酒店有少少定位係親子friendly，所以除左遇難式主池外仲有1.2M副池、兒童池、大小水滑梯、大桶水照頭淋等等嬉水設施，大人細路都一定玩個不亦樂乎~
至少我呢個大細佬玩到唔願走~
想靜局d，酒店有自己私人海灘~ 衝落水又得，坐沙灘椅睇下書又得~
不過最吸引都係呢個海中鞦韆打卡位~ 勁岩推另一半落水~
唔玩水既朋友(咁嚟沙巴做乜??)，酒店內都有Spa、Gym room、遊戲室等~ 亦有出海野餐Tour (但勁貴)
我最欣賞係佢每日都有唔同既主題節目／遊戲比住客玩~
我果日就有無聊但有趣既椰子保齡球~ 乜都碌唔中但幾過癮呀~
邊個諗d咁有趣既野出嚟～但估唔到幾難扔wor～
其實就算唔玩呢樣果樣，係酒店超大既花園散下步影下相都寫意自在呀~
特別推薦呢間白色穿窿爛屋幾好影相呀~
5. 餐廳
酒店內有6間餐廳~
- Borneo Lounge & Bar : 大堂lounge都chill chill地~ 睇唔到咩風景適合落雨無野做飲返杯~
- 香宮Shang Palace : 中菜餐聽聞出名，但我諗香港人唔會無啦啦走去食ga
- Coco-Joe’s Bar & Grill : 海邊BBQ餐廳環境一流，但Tripadvisor 同Google上的評價均非常普通
- Cool Box Ice Cream Bar : 泳池雪榚店唔平，但都好多小朋友食
於是最受歡迎既應該係Buffet餐廳的Café TATU了
餐廳係連接主館和花園，可自由選擇坐戶外風扇位定凍到黐肺冷氣位~
According to我食過既早餐，食品種類既多元化又數量眾多，除左常見既西式薯餅腸仔pancake cold cut雞蛋所有煮法及中國四大發明外，馬來西亞、泰式、印度、 日式，連韓式早餐都有!
都明ge，沙巴真係好多韓國旅客，周圍都襟沙阿咪打完顏阿骨打
難得既係味道普遍都非常唔錯! 早起身係值得ge~
6. Sunset Bar
其實Shangri la Kota Kinabalu酒店最出名既就係呢間位置幾乎完美既Sunset Bar
其實沙巴好多sunset bar，多到只要佢係海岸邊賣酒既都睇到日落~
但Shangri la呢間sunset bar正正食住被評為世界三大日落「丹絨亞路海灘」最靚既位置，點可能唔正?
日間的樣子
入夜後有feel好多～
店內採用完全預約制，基本上一兩星期前已經full哂
少量walk-in位的位置並不太好，TripAdvisor有人話非住客要收入場費
至於座位分成兩種 :
- Sun Lounger (RM188~約$300)
- High Table (RM98~約$160)
(*****以上為May 2023價格，半年後Nov 2023已經貴左近一倍……)
Sun Lounger係最前排的座地梳化位，可坐2-3人，前方一望無際infinity pool式睇日落
High Table則是Sun Lounger後方的高枱高凳，係正常酒吧飲酒既感覺，只係無座地梳化咁嘆咁chill，但日落觀感一樣咁fit~
由於兩者分別除左座位，就只在有無free flow同食物種類，價格卻差一倍，我紅白酒一兩杯即醉，都係舊幾水High Table性價比高d~
反正不論坐咩位，睇ge咪又係果個靚靚咸蛋黃~
注意兩種table都分前排後排的，後排Sun Lounger會比前排遮到少少，所以要有最靚既觀景體驗位就要早d book同準時5點囉枱了~
而我個人覺得坐第一排High Table係好過後排Sun Lounger的~
只要前面無人行嚟行去，無d韓國大媽睇日落都怕曬舉遮，同無土豪韓仔free flow狂劈自隊飲醉高舉天殘腳就得啦……
Anyway啦~
能在旅程最後一天，摸著酒杯，在此欣賞沙巴美麗絕倫的金色日落，如此情調氣氛，實在完美!
咩話? 食物與cocktail的水準?
Ok ge~
不過，Who cares~
Shangri-La Tanjung Aru, Kota Kinabalu既介紹就到呢度~
間酒店整體我真係超級滿意~ 但如果真係要挑骨頭，可以話遇到以下事件 :
- 浴缸旁塊大玻璃封死左無得透視，令女士浸浴時我只可以睇電視
- 而電視會因為惡劣天氣而無signal
- 生日蛋糕會係牛一早一兩日酒樓阿姐點心車式推到門口，再順豐送貨式隊比你，咩驚喜都無哂
- 西翼架𨋢壞足兩日，惡劣天氣當日甚至令我困𨋢左15分鐘熱到嘔，不過佢地事後有比道歉信及送果籃(果籃呢下我笑左~xxxxxxxxxxxxxxxxxxxxx)
Anyway啦~
以上都係暇不掩瑜，間房$1400左右一晚，即係人均$700蚊一晚，就住到沙巴最高級酒店兼有齊上述種種享受wor!! 性價比會唔會高得太過份?
係而家香港staycation千幾二千銀一間房乜都無既時候，飛過嚟住幾日會唔會仲開心抵玩呢~
《亞庇丹絨亞路香格里拉水療渡假村》Shangri-La Tanjung Aru, Kota Kinabalu
- 地址： No. 20, Jalan Aru, Tanjung Aru, 88100 Kota Kinabalu, Sabah, 馬來西亞
- 電話： +60 88-327 888
- Booking.com : https://www.booking.com/hotel/my/shangrilatar.zh-tw.html
- Agoda : https://shorturl.at/dwzC9
跟 JOYKreator 玩盡世界！✈️
鋒加西亞
Hello我是鋒加西亞~ 歡迎來到我的旅遊Blog網站「鋒加西亞 – 德國工作假期後的世界流浪」!
如果想搵富貴旅行嘆世界資訊ge，抱歉~ 呢度只有由一堆廢話組成，一人背包窮遊的主觀無聊遊記~
此Blog起源於2013年我前往德國工作假期，原名「瘋人鋒語 – 三十前八十後的德國工作假期」，起初純粹想簡單記錄心路歷程，慢慢由日記變成遊記，由出走德國變成走過好多國，至今已到訪49個國家(疫情關係第50個泡湯了…..) 希望疫情快過，大家都可以再次出走啦!
另外我只會用香港式廣東話寫作。
雖然會影響閱讀觀感，但我個人卻非常喜歡這種「看文字就像聽聲音」的感覺，內文用詞也能直接映出我一貫的說話風格，所以——非粵語使用的朋友對不起啊!
總之希望大家看得輕鬆開心~ 如果能對大家計劃行程有所幫助就更好了~
如有任何意見，或想知道更多文章內的資訊，隨時歡迎留言或email funggarcia@gmail.com和我傾下偈呀~
- IG@fung_garcia_backpacker
- FB@鋒加西亞 - 德國工作假期後的世界流浪
更多旅遊貼士：
