廣島宮島兩日精華遊 暢遊嚴島神社 尾道千光寺纜車


去5日大阪旅行,又唔想淨係玩大阪咁齋?可以考慮留兩日時間玩到落廣島,廣島除咗世界聞名嘅日本三景之一宮島嚴島神社、原爆紀念館之外,尾道市嘅海港風情都好值得一到,近幾年仲搖身一變成為文青景點添。講到廣島點少得當地美食-廣島燒?KLOOK編輯部今次示範用JR關西&廣島地區鐵路周遊券5日券,玩盡大阪之餘仲可以嚟個廣島宮島兩日精華遊,行程超豐富,未去過廣島就值得bookmark喇!

兌換JR PASS實體票券程序可參考>【日本攻略】京阪神唔夠?大阪玩到落廣島!JR關西廣島鐵路周遊券


Day 1 – 大阪出發 前往廣島尾道市!

第一日行程: 尾道U2倉庫 》 尾道商店街 》 千光寺纜車、展望台 》廣島原爆紀念遺跡 》廣島燒晚餐

一早從新大阪站出發,可以乘坐「山陽新幹線」由新大阪到廣島區間,途中需在福山站轉乘山陽本線,到達尾道站約需時1小時45分,可以先買個早餐上車慢慢食,仲有時間恰一陣!


帶著單車去旅行 文青最愛U2倉庫

尾道市和愛媛縣的今治市中間有跨海跨島大橋,可以徒步或者用單車通行,沿路景色非常迷人,更被CNN譽為世界上最優美的單車步道,吸引國內外單車迷歡迎,第一站嚟到尾道市文青景點「U2」,係由舊倉庫改建而成,而家係以單車旅行為主概念嘅複合設施,除咗文青精品、麵包店、咖啡店、餐廳酒吧等等。對單車使用者亦十分friendly,除咗有大量泊位放單車,亦有單車用品店。

外表仍然舊舊哋嘅U2倉庫,原來內有乾坤
U2仲有住宿設施在內,工業風格舒適有格調,一晚住宿約為12000日幣起
單車用品店,咖啡小食、精品等等一應俱全,又有得睇海景,係尾道一眾潮媽嘅下午茶聚腳點。
房間最特別之處係所有房嘅牆身都可以都有單車架,貫徹單車旅行概念

U2倉庫
地址:廣島縣尾道市西御所町5-11 (尾道站步行5分鐘即到)


尾道商店街 懷舊日本氣息

尾道商店街充滿舊式日本風情,除咗舊式文具店、服裝店、玩具店,近呢幾年廣島年輕人為咗活化家鄉,都開始咗搬返尾道市開店,唔少新式咖啡店同麵包店進駐,令尾道商店街有返人氣!唔少尾道特產如檸檬蛋糕、尾道拉麵等都可以喺呢度買到,注意係部分舖頭只係星期六日先會開門,千祈唔好摸門釘呀

以前係公共澡堂,而家已經係小賣店。

千光寺纜車 盡覽尾道市全景

一路行到商店街盡頭,就可以出發坐纜車上千光寺公園,坐到山頂只需5分鐘,上山時真係睇到全車嘩嘩聲,尾道市咁靚的海景實在超治癒!

千光寺展望台可以睇哂成個尾道市景色,必打卡之選!
一場嚟到尾道當然要試當地名物-尾道拉麵啦,醬油湯底意外地清爽不膩

思考戰爭歷史 廣島原爆遺址

食完尾道拉麵做午餐,就向廣島市中心進發,喺廣島新幹線口搭觀光環遊巴士「Meipuru~pu」,直達廣島市內主要景點包括廣島城、廣島美術館、購物狂必到紙屋町同埋原爆遺址等等。如果持有JR廣島Pass的話,仲可以任搭添!真係連車錢都慳返呀!

觀光環遊巴士由於係循遊路線,每條路線都會經平和公園同原爆遺址,所以唔怕唔識落車,先去平和公園的原爆紀念館,可以睇到遺留落嚟嘅歷史資料同物件,令參觀者了解戰爭的殘酷,亦祈求世界和平。平和公園走一段路就會到達原爆遺址,廣島是全世界第一個被原子彈攻擊嘅城市,爆炸的瞬間整個城市幾乎夷為平地,只有呢個圓頂建築仍然屹立,也成為了廣島市的象徵。

廣島的路面電車也充滿特色
紙屋町商店同餐廳林立,是廣島最熱鬧的一個區域。
去廣島要食廣島燒係常識吧?喺廣島,廣島燒餐廳多到數唔哂,每一間都有自己獨門配方,口味都有唔同㗎!

Day 2 – 朝聖海上鳥居 親親宮島小鹿

第二日行程: 宮島商店街掃街 》宮島嚴島神社 》穴子天婦羅飯午餐

第2日出發去日本三景之一嘅嚴島神社,首先由廣島市中心搭去「宮島口」站,再坐JR渡輪去宮島,同樣出示JR Pass可以免費乘搭。一落船已有小鹿在碼頭範圍迎接,同奈良鹿最大分別係,宮島鹿唔會追住你要食物,溫馴得多!沿宮島表參道商店街,有好多賣紀念品嘅舖頭同食店,記得試著名廣島燒蠔!

宮島嚴島神社與京都天橋立、宮城縣松島海岸並列為日本三景
最清楚睇到海上鳥居的嘅岸邊,亦係最多鹿仔聚集之地
廣島嚴島神社朱紅色的內部

推薦呢一間天婦羅飯,烤穴子食得多,穴子天婦羅肉厚多汁仲好新鮮添

てんぷら津久根島 宮島店
地址:広島県廿日市市宮島町北大西町1167-3
每日11am開店,不定休


睇完編輯介紹廣島宮島兩日精華遊,係咪即刻心郁郁想去返轉廣島呢?廣島宮島行程可以話係大人細路都會適合,推薦使用西日本JR Pass,喺KLOOK預訂仲可以即時確認,慳錢之餘仲好方便!

JR關西&廣島地區鐵路周遊券5日券

兌換JR PASS實體票券程序可參考>【日本攻略】京阪神唔夠?大阪玩到落廣島!JR關西廣島鐵路周遊券

Previous 【泰國潑水節】狂歡注意事項全面拆解
Next 【日本甜品】東京淺草4大日式點心