福岡租車|九州自駕遊攻略!一向只係背包旅行既我,終於完成第一次自駕遊,成功踏出comfort zone啦! (因為我渣車好唔comfortable ……..)
而自駕旅行所見到既野、行動方式,以及計劃行程時既思考方向,又真係同平時搭車又搭船好暈呀好唔同。應該都有好多朋友好似我咁,決定要去日本第一次自駕遊時盲鐘鐘on居居又心驚驚唔知預備d乜好
所以今次呢篇,係我集合所有幫過我既好朋友之建議 + 自己搜集既資料 + 撞板經驗,總結出嚟既日本自駕遊全攻略懶人包!希望幫到大家啦~
由於國際慣例,寫得太長於是分成上下兩篇~ 今次上篇租車攻略,先講下租車既方向與流程~
1. 為何要自駕遊?
2019年與爸爸行富士山既Family Trip時我已經覺得,even曾係運動健將既爸爸亦敵不過歲月,係鎌倉景點之間行來行去已有d吃力
數年後既而家父母年紀更大,病痛亦更多了
如果想父母唔使搭車又搭船好暈呀,舒舒服服專心享受旅程的話,都係有架車好d~
何況渣車自由度大,玩太攰隨時休息就得,呢度唔好玩立即跳過又得,唔使受日本非市中心地區超級勁疏既巴士同火車限制~ 時間運用靈活得多~
更更重要係你架車就係一個流動locker! D行李扔哂係車尾唔使理兼隨時囉得,唔使負重周圍走
唔通要佢地兩老70幾歲仲同我一齊backpack咩!
甚至外面天氣零度以下要搵個地方食雪糕,架車都幫到你!
(今次其中一日既行程係由布岳+九重夢大吊橋+タデ原濕原,三個地方都係非常值得去,但都係睇唔夠一個鐘就要閃,慢慢等粒半鐘一架既巴士真係蚊都訓)
2. 為何日本九州超適合自駕遊?
簡單三個字 ——- 「超方便」!
九州非常多野玩~ 只係北部著名既必去景點已經有由布院、別府、黑川溫泉、阿蘇火山、高千穗峽等等,但呢d地方全部都係「揸車好近,巴士好遠」! 仲要未必有巴士到wor!
以2016年時我由黑川溫泉出發至高千穗峽為例,地圖睇落明明好近,偏偏就因為無巴士直接去,攪到我要先出返熊本市中心過一晚,第二日一早坐3個鐘巴士入高千穗峽,玩完粒幾鐘後又坐3個鐘巴士返熊本,咁一來一回交通已經用左6粒鐘!! 仲未計前一晚既交通花費wor!!!
如果對九州既地理無概念的話,可以先睇下方圖片,或想像粉嶺無車落沙田,要先兜屯門再入去,就會明件事有幾咁痴線!
但根據google map及我今次實證,黑川溫泉至高千穗峽渣車只需1小時多d!
你話啦,識得渣點可能唔渣
另外我唔少豐富自駕經驗既朋友都話「九州和沖繩係日本最易渣車既地方」
一來道路唔複雜,二來人車都唔算多,三來日本人渣車相對有禮,唔似香港慢少少都小喇叭,多數初心者第一次自駕都會揀呢兩個地方的
返嚟後我覺得以上都係超級岩的~
不過要再加多一點就係 ——- 阿蘇火山周圍的道路風景超級勁靚!!!!
我肯定呢個唔係普通背包坐巴士可以見識到既體驗!
係九州Road Trip,絕對係我今次旅行最正確既決定!
3. 租車公司的選擇
講到租車,日本的確有超多租車公司,對我呢個渣車初哥嚟講真係花多眼亂,完全唔知點入手
所以,唔好煩,用Klook啦!
用Klook租車最大既好處係超簡單唔使煩,係我地平時熟悉既介面上,一次過睇哂多間租車公司有咩選擇
免卻睇一間一間租車公司網頁去做資料搜集之餘,仲免埋日文網頁古怪翻譯睇到唔清唔楚既弊病
車既選擇又多,所有詳細條款都用我地明既中文清清楚楚列哂出嚟,有咩唔明可以立即問線上客戶服務
而簡單既仲有租車程序,又係平時咁篤幾個掣1分鐘攪掂,仲有free cancel policy,後悔既48-72小時前點改都得~
Book完後anytime都有CS幫你follow,對今次租車有咩額外要求例如要ETC card、學神牌、汽車兔女郎等都會幫你跟進~
雖然最後無汽車女郎出現,但我對Klook呢個租車服務真心滿意~ 但值得推薦!
4. 汽車的選擇
A. 行李箱容量
最常見亦最常中既伏係 —— 幾多人就租幾多座位既車!
聽落好似唔覺有咩問題wor,4個人咪租4人車,要車7個女仔咪租7人車law,好正確呀!
以上係妳平時出街,但妳而家係去旅行,有行李ga!
4個人就有4個喼,7個人就有7個喼,仲未計隨身袋和血拼戰利品,你確定妳架車既車尾箱有咁大容量??
我當年既北極圈自駕遊,同行朋友就係租錯左細7人車,7個人十幾件行李要sip到落凳底同放上膊頭,完全係一罐移動的沙甸魚……
所以租GTR都唔緊要,最緊要放得落你d行李~
又唔係話一定要4個人都租架校巴先得ge,只是係租車前必需先計算所有同行人的行李大小及數量,然後再google or youtube check下心儀車款的行李承載量又有幾多
又或籠統d講 —- 2人行可租細4人車 ; 4個成年人,大概租架細6-7人車一定夠位
Klook租車時會寫明此車的可載行李數目~
我租果架佢寫2件,但就夠哂我一家「1中喼+2細唸+5隨身包+仲有好多吉位亂咁放戰利品和厚羽絨」,所以我估佢兩件係指兩個30寸大行李箱之餘仲有空位~
比大家參考下~
B. 車身大小
世界上好多野唔係size大就勁ge!
日本既道路 —- 不論市區定高速公路,其實都比想像中窄,山路及鄉郊地區就更過份,唔少甚至單程行車要讓路!
另外停車場入口及車位均偏向狹小,所以如果部車太大,就變成大甘筍塞倉鼠口,好難入ga! (我由頭到尾都講緊架車唔好亂諗)
由於部車size太大係日本行駛會非常非常麻煩,所以妳留意到日本人既車多數細窄瘦長,短小精幹,入鄉隨俗,似乎都係租返架細d靈活d既車穩陣d wor!
不過問題就係 —– 細,就一定無咁舒服
車身狹窄個內籠唔可能闊落ga,空間不足,乘客自然就逼好多坐得無咁舒服,特別冬天衫厚4舊米芝蓮迫係車內更加囉命!
偏偏今次租車既最大目的就係要兩老坐得舒舒服服去玩!
人生交叉點就係「細車易渣安全d」vs「大車難渣舒服d」!
最終,我都係揀左大車……
日產Nissan X-Trail第三代,中型5座位SUV
雖然係舊車款,但外觀內膽均非常新淨摩登,按日本人對整潔既追求,架車直情靚到新車一樣呀! 而座位更舒服到大班椅咁~
兩個70歲老人家,幾乎近一半行程都係架車度,唔比兩張龍椅佢地係後座耍太極點得!?
事後兩老均對此車非常滿意~ 大讚8日旅程連一絲坐到攰既感覺都無~
咁就太好啦! 父母開心比一切都重要!
只不過代價就係經常發生路太窄軚盤郁少少就fing左去隔離線、停車場太矮太窄入唔到、泊完先發現同隔離車只有0.01超薄距離等等由麻煩至有生命危險既各種問題je……
5. 取車程序
以我今次經Klook book既租車公司Nissan Rent A Car為例~
福岡機場出閘後最左邊會有幾個無人counter,搵岩租車公司後囉起個電話會自動打去,聽完一大段唔知點解你要聽但又聽唔明既日文錄音後,就會有職員接聽,之後會再搵個識英文or普通話既職員嚟~
需時大約5-10分鐘,我後面等打電話果對香港情侶等到走左
同佢溝通到既職員講返book車編號和相應資料,就可以囉埋行李,上3樓離境大堂北出口(面向室外的最右方) ,行出出面慢慢等免費專車嚟車你去囉車~
唔使擔心,專車到左果陣,會有工作人員囉住名牌嚟搵你,你擔心下外面太凍冷襯好過啦~
專車會直接車你去機場附近的租車公司,車程約5分鐘左右~
由於係Klook已經比哂錢,剩底既手續好簡單,填張form,揀埋有NOC既保險,等職員預備埋ETC卡同講兩句必須要知既資訊,唔使10分鐘,yeah囉得車啦!!!!
唔好第一時間上車踩油開升壓渦住! Check車呀!
職員會同你一齊慢慢兜車一個圈check下架車有咩花左有咩凹痕,如果有既佢會mark低證明囉車既時間已經有唔關你事
我強烈建議一邊check一邊拍片,乜都有證有據,仲要睇埋車胎車ling同車頂,有咩奇怪同疑問立即出聲,保障大家ga ja!
至於我囉車時天已黑哂,條片其實一樣黑嗎嗎乜都睇唔到…..
Anyway check完哂就攪掂哂~ 架車係你ga啦可以渣走ga啦~
嚟緊幾日就靠你啦大牛龜!!!
6. 還車程序
玩完咁多日幸運地無穿無爛,係時候還車啦~
還車好簡單,之前囉車時職員會比定張紙你,寫哂店舖位置及附近油站,去入滿油後渣返租車店,店員check過架車無花無爛無問題,比埋經過ETC既highway錢就閃得了~
如果去機場的話,職員仲可以免費車埋你地過去tim~
講真呀,到走果下真係有少少唔捨得架車
話哂對足咁多日,日日載住我地東奔西跑,辛苦你啦!
我而家終於有少少明白路飛佢地要放棄前進號時既心情了……T_T
多謝妳呀Nissan X-Trail!!! 我會永遠記住你ga!!!!! 囉個火把嚟唔該……
講真呀今次KLook租車真係幫我慳左唔少時間,煩少好多野~
如果大家去日本需要租車,的確係一個唔錯既選擇~
好啦租車既事暫時到呢度~
下篇講下自駕遊開始前的預備工夫~
跟 JOYKreator 玩盡世界!✈️
鋒加西亞
Hello我是鋒加西亞~ 歡迎來到我的旅遊Blog網站「鋒加西亞 – 德國工作假期後的世界流浪」!
如果想搵富貴旅行嘆世界資訊ge,抱歉~ 呢度只有由一堆廢話組成,一人背包窮遊的主觀無聊遊記~
此Blog起源於2013年我前往德國工作假期,原名「瘋人鋒語 – 三十前八十後的德國工作假期」,起初純粹想簡單記錄心路歷程,慢慢由日記變成遊記,由出走德國變成走過好多國,至今已到訪49個國家(疫情關係第50個泡湯了…..) 希望疫情快過,大家都可以再次出走啦!
另外我只會用香港式廣東話寫作。
雖然會影響閱讀觀感,但我個人卻非常喜歡這種「看文字就像聽聲音」的感覺,內文用詞也能直接映出我一貫的說話風格,所以——非粵語使用的朋友對不起啊!
總之希望大家看得輕鬆開心~ 如果能對大家計劃行程有所幫助就更好了~
如有任何意見,或想知道更多文章內的資訊,隨時歡迎留言或email funggarcia@gmail.com和我傾下偈呀~
- IG@fung_garcia_backpacker
- FB@鋒加西亞 - 德國工作假期後的世界流浪
更多自駕遊貼士: